مقالات

متلازمة روئة

بقلم / حنان الابياري 

“متلازمة روئه ”
يعني ايه !؟
الموضوع طويل بس هحاول اختصره .. الراجل المصري سواء كان دكتور او مهندس او تربوي اوي ايآ كانت شهادته اول مابيفكر في انه يتجوز بيبقي كل همه هو والاهل مستوي البنت اللي هايتجوزها العلمي . فتلاقي الاطباء معظم زوجاتهم طبيبات او مهندسات والمهندس تلاقي زوجته طبيبه او زميله دراسه مهندسه زيه والمدرسين لازم تكون الزوجه اما تربويه او اضعف الايمان تكون مؤهل عالي بتشتغل او ربة منزل المهم الشهاده

خلاص كده حضرتك !؟ اخدت الشهاده اللي كنت بتدور عليها !؟ اطمنت ان اولادك هايطلعو طبقه راقيه ومتربيين كويس !؟
طيب نيجي بقي هنا للزوجه حضرتها برستيچ عالي وزوجة طبيب او مهندس او قاضي او مدرس او او او او طبيعي جدآ مش هاتبقي روئه حضرتك 🤔
يعني علي سبيل الميثال لا الحصر حضرتك زي ما انت طبيب هي طبيبه وزي ما حضرتك بتشتغل هي بتشتغل . حضرتك عندك عيادتك وهي كمان زيك . عندك التزاماتك هي كمان زيك يبقي ماتنتظرش انك تدخل بيتك تلاقي اكلك سخن وبيتحضر علي السفره ولا اول ما تدخل تلاقي طبق مايه سخنه وملح تحت رجليك وست قاعده تدلكك 🙄
ولا خيالك يوصل بيك لمرحلة انها حافظه عدد شرباتك مثلا . دا هي لو افتكرتك انك من اهل البيت هايبقي بالتعود انها بتشوف الشكل ده كل يوم في بيتها 😄
واوعي عقلك يقولك ثور واغضب لان الرد عليك هايكون قاتل .
انا هنا زيي زيك وهتلاقي النديه اشتغلت وابقي قابلني لو عرفت تتقبل جعفر صاحبك اللي عايش معاك في نفس الشقه

ييجي هنا بقي شبح “روئه ” بدون ما تشعر تلاقي الحرمان من رجولتك بقي تاعبك والمستقويه اللي اخترت شهادتها بأرادتك كسراك وعنيك وقلبك ومشاعرك بتصرخ من الجفاف والاحتياج لكلمة نعم وحاضر . فاقد الدفئ اللي كل راجل بيحتاجه من ضعف روئه وبدون ما تشعر بتلاقيها اتسللت جوا حياتك وبتتعلق باللي دورت وتعبت لحد ما لقيتها وبتبقي مبسوط ولكن بدل ماتكرمها وتصونها علي راحتك معاها ورجولتك اللي رجعتلك بكسرتها وضعفها وتحافظ عليها . انت كمان بتدوسها وبتفرمها وبتقلل منها

بتبتدي تفرض شروطك وانت اسير ضعفها اللي استمديت منه قوتك .
امتي تقربها منك وامتي تبعدها . امتي تحسسها انك راضي عنها وامتي تجيب مناخيرها الارض وتحسسها انها ولا حاجه
فاجئه مستواك الاجتماعي بينقح عليك وبرستيچك وبتفتكر ان فيه اولاد وبتخاف علي اسمك وعيلتك وسمعتك اللي هي اصلا كانت منسيه طول الوقت مع الند اللي مشاركك كل نفس بحكم القانون والحق وانت مش قادر تعترض و عايش معاه في تعاسة السنين وبتدور علي روئه

ربنا لما اتكلم عن الزوجه قال
” بسم الله الرحمن الرحيم
وخلقنا لكم من انفسكم ازواجا لتسكنو اليها ..
صدق الله العظيم
” السكن ” _ ربنا وصف الزوجه او الشريكه بالسكن . بالراحه
ماقالش خدها معاها دكتوراه في الچولوچيا مثلا ولا قال لازم تكون معاها لغه واتنين وبتلبس براندات واهلها من عيلة فلان وعربيتها ماركتها كذا ولا لازم تبقي استرونج اندبندت وومان عشان تبقي حضرتك كده الراجل الواو يعني 👎

مش بقول ان المظاهر وحشه بالعكس ولا بقول ان الست اللي بلغت من العلم اعلاه مش ست ولكن لازم حضرتك تبقي فاهم ان الست اللي انت اخترتها بالمواصفات دي عمرها ماهتبقي روئه .. روئه انت تقدر تحولها لهانم بشوية ورق ملون . انما صعب تحول ندك لروئه لان الانوثه صعب تدرس . دي فطره اما بنحافظ عليها ونراعيها ونكبرها او نطمثها ونعمل لنفسنا كرير مزيف 😉

روئه دي ليها مميزات ومواصفات البهوات اللي زيك يجهلوها عند التفكير في الجواز . لكن اما بيتلسعو من الشوربه بيفوقو
وبتظهر عليهم اعراض متلازمه الروئه

القصد من كل اللي قولته ده . مهما وصلت لمراتب علميه ومهما بلغ بيك الامر وبقيت وزير او حتي رئيس جمهورية
انت في الأخر رااااااااااجل ومحتاج روئه في حياتك مهما اتكبرت وعصيت احساسك وقولت مش عايز ،
انت بتكدب
في قرارة نفسك هاتموت وتلاقي روئه . فلما تلاقيها نصيحه مني اوعي تسيبها تضيع منك لان روئه في الزمن ده بقت عمله نادره ، وخليك فاكر روئه دي مش حد ضعيف وضايع ومالوش سعر ..
دي ست وعرفت تبقي ست معاك وتحسسك برجولتك .ونعم وحاضر اللي بتقولهالك دي فلسفه مش اي ست تقدر عليها ولا اي راجل يستاهلها وطالما حبتك وعملتك راجلها اتقي ربنا فيها وبلاش تندمها علي اصلها الطيب معاك ،
او سيبها من غير ما تجرحها وخليك مع الند اللي عايش معاك بالورقه والقلم والحقوق والواجبات واتعالج من متلازمة روئه لو عرفت ،

اسفه للأطاله ولكن الموضوع ده شاغلني ليه فتره لان معظم الستات بتشتكي من خيانة الازواج وكل الازواج بقت حاسه بالفشل في حياتها مع الند ومصابين بمتلازمة “” روئه “”

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق