ابداعات

واحشني

مينا مكرم

وحشني أيام ماتتعوضش
واحشني كلام كتير ماتقلش
واحشني بنت حبيتها
و بعد الفرقه ما نسيتها
واحشني أبويا اللي كان عيان
و في وسط تعبه كان فرحان
و بيهزر و بيناغش
وحشني صوته القافش
لكنه مات عن الدنيا
لكن جوايا لسه مامتش
واحشني جدا كلام الهاتش
علي قهوه مع أصحابي
لكل الناس فاتح بابي
و إن كان عالفرقه أنا ماقدرش
ولا الكدب يكون حليفي
تلاقي الصدق في رغيفي
بدفي الشتا بحر صيفي
و وسط الشده أنا ماضعفش
و أحاول أعافر مع الدنيا
و أعاشر في ناس خاينه
ده الغدر بييجي في ثانيه
و لسه قلبي ماتعلمش
وحشني مصروف المدرسه
و حلم إني أدخل هندسه
وحشني صوت المكنسه
و شبشب ماما عشان مابذكرش
وحشني أول يوم طلعلي الكرش
وشفطة بطني في البنطلون
و سهراية علي التليفون
وضحك من القلب كتير بالكوم
و بكره اللي جاي مضمون
و الفرحه اللي ماتتوصفش
خايف العمر يجري بيا
و تضيع سنيني اللي جيه
و أعيش علي ذكري منسيه
و آجي أعيش حياتي ملحقش
و خايف سنيني ماتتعوضش
#إبن_مكرم
الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً

إغلاق
إغلاق