ابداعات

سيبها و امشي

بقلم : عمر علي

سيبها وامشي
لسه فاضل فيها ايه
فيها اللي ظلمك وخانك
واللي مش عايش عشانك
ولا حد عارف مكانك
يبقي يلا جه آوانك
سيبها وامشي
سيبها من غير ما تبكي عليها
ولو شفت الدموع ف عنيها
تبقي مش نازلة عليك
انت مش فارق معاها
مستني ايه ما تبيع هواها
متسألش ايه اللي مشاها
سيبها وامشي
سيبها يلا ومتفكرش
في حد غيرك اولي بيها
بتحبها ايه بقي .. متهزرش
ما انت عارف اللي فيها
ناوي تعيش عبيط علي طول
يوم بالعرض ويوم بالطول
يوم بكرامتك يوم من غير
عمر ما هيفيدك لوم الغير
واللي لسه فيه الخير
هو اللي حبه زي الطير
عمره ما يثبت يوم علي حال
وكل يوم شكل وموال
ولا تسحروش رنة خلخال
مش بيفكر يجيب عيال
اهه ده اللي يفضل هادي البال
مش هتعرف تبقي زيه
سيبها وامشي
ولا اقولك خليك
بس الأول ..
تعرف تعيش قلبك حجر
مش مستني حاجة من البشر
تعرف تعيش من غير احساس
وبخوف وغربة ما بين الناس
لا تدوس حد ولا تنداس
عشان تعيش علي طول مرتاح
من غير ذل ولا حتي جراح
عيش كأنك مش موجود
وبأمل وايمان ومحدود
متفرش طريقك ورود
مسيرها ف يوم هتدبل
واوعى تفكر أو حتى تسأل
هي دبلت ليه
سيبها وامشي
لسه فاضل فيها ايه …

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً

إغلاق
إغلاق