ابداعات

بقالي كتير مكتبتش شعر

بقالي كتير مكتبتش شعر

قصيدة بقلم عمر علي

بقالي كتير مكتبتش شعر
بقالي كتير مجبتش سيرتك
لا بقى على لساني اسمك
ولا بقى في قلبي حتى صورتك
مبقتش بزعل على غيابك
ولا بمشي أسأل عنك صحابك
ولا حضنك لسة بالنسبة لي أدفى
وأكيد إنتي برضه عارفة
إننا حتى لو اتقابلنا صدفة
مبقاش لقربك نفس السحر
بقالي كتير مكتبتش شعر
بس مش هكتب عنك حرف زيادة
كفاية اللي قلته قبل كدة عنك
هسيبك تعيشي قصتك الجديدة
أما اللي جت ف حياتي بعد منك
فاسمحيلي أكمل فيها القصيدة
وأخلص عليها بقية الحبر
بقالي كتير مكتبتش شعر
ياللي دخلتي حياتي في لحظة
كنت بجد محتاجلك فيها
وف عيد العشاق سبيني
أقولك كل حاجة مخبيها
شيلتي من جوايا
وجعي ووجعها
وقررتي تكوني معايا
وقلتيلي خلاص ودعها
وفجأة بقى صوت ضحكتك
أجمل حاجة أنا بسمعها
ياللي رقتك زادت جنوني
أتمني لك دايماً تكوني
أميرة على قلوب حبايبك
نسمة خفيفة على كل روح
انا اللي هفضل متحمل مصايبك
من غير ما اقول ف داهية تروح
وهدعيلك مليون دعاء
من جوه قلبي من هنا
ده صوتك لو سمعته الشيماء
جايز تفكر تبطل غنا
ويتشال من عليها الوزر
بقالي كتير مكتبتش شعر
حققت معاكي حلمي
اللي كان صعب المنال
إتطمنت للدنيا تاني
ورجعت هادي البال
ياللي جمالك ف الحسن آيه
ودموعك زي الندى
بحمد ربنا إنك معايا
ياللي عمري بيكي ابتدى
أتاري الوحدة طلعت
أكتر حاجة ضارة
ياللي ابتسامتي بيكي رجعت
اسمحيلي اقولك بشرى سارة
انا ..
بطلت الفراق والهجر
بقالي كتير مكتبتش شعر
إنتي أجمل ما شافت عيني
الفرح ساكن بينك وبيني
ف حضنك م الأحزان خبيبني
وكل نجاح فيه تقاسميني
أكمل جنبك اللي جاي من سنيني
ويطلع علينا سوا كل فجر
بقالي كتير مكتبتش شعر
بقالي كتير مرتحتش كده
كنت بنام كل ليلة وحياتي متنكدة
خليني أرجع سعيد
فياريت تكوني سعيدة
شكراُ على كل حاجة
وشكراُ برضه على القصيدة
وصلت خلاص لآخر سطر
وبجد كان بقالي كتير
مكتبتش شعر
الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً

إغلاق
إغلاق