ابداعات

أنا وحداني

من وحي : عمر علي

أنا وحداني

سطرها : عمر علي

أنا وحداني
بدور علي نصي التاني
علي فرحة أكيد وحشاني
وهو ده اللي خلاني
احبك انتي وانساني
يا تري لسه فاكراني ..
ولا منسيتينيش
انا اللي جبت لك ف عيد ميلادك هديتين
وانتي ف عيد ميلادي مفتكرتينيش
انا اللي كان كل همي افرحك
وانتي مفرحتينيش
انا الموهوم
اللي كان نفسه بقية حياته
ف حبك يعيش
متتأسفيش
الأسف بعد الوجع ملوش معني
ويا ريت يا حبيبتي يوم وداعنا
متعيطيش
انتي اللي اخترتي الوداع
متجيش تقولي هو اللي باع
فياريت لما اقول انا مش عايزك
مستغربيش
وديتيني بحرك عطشان
واول ما بدأت اشرب رجعتيني
قلت لي مش عايزة اخسرك
بس انتي فعلاً خسرتيني
انا عايزاك وجوايا مشاعر ناحيتك
كلام قلتيه .. وانتي مش حاسه بيه
كلام خلاني امشي ف سكتك
خلاني اعشق ضحكتك
اتمنيت اعيش وياكي دنيتك
زرعتي ف قلبي محبتك
وانا ف قلبك مليش مكان
انا انسان
نفسه يعيش محبوب
ف الدنيا ياما كتير قلوب
بس انا نفسي ف قلب واحد
مش طمعان
وبحبه ليا هكون فرحان
يقولي انت كل اللي ليا
وف عيد ميلادي يجيب لي هدية
ياخدني ف حضنه لما يشوف دموع عينيا
يطمني لما اكون قلقان
طلبي طلب غلبان
ومع ذلك للمرة التانية
غلطت ف العنوان
بس أنا اقوي من كل الوجع
اتخلقت عشان اكون فرحان
وان قلبي ليكي ف يوم رجع
ابقي قولي عليا جبان
أنا مليان
حب وخير وصدق وإيمان
إيمان بإني ف يوم هلاقيكي وأناديكي
يا حبيبة عمري اللي قلبي
بقاله زمان بيدور عليكي
بس إوعي تجيله متأخر
ده متصبر ..
بشوق وحنين
أنا شاعر من التايهين
أنا شاعر كلامي جميل
عشقت الضحك والمواويل
لكن كل يوم بالليل
ببص حواليا ألقي نفسي وحيد
ومن جديد .. أكيد
هقدر احب تاني
يوم ما الاقي نصي التاني
وياللي انتي جاية وناوية تحبيني
مش هسألك ايه المقابل
ولا هطلب تجاوبيني
إنتي بس حبيني
ومن غير ما تطلبي هديكي عيني
وشوية حب علي إخلاص
وكل اللي فات واللي جاي ف سنيني
هما دول كل اللي حيلتي
هتقبليهم مني
ولا انتي كمان هترفضيني ؟؟….

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق